ព្រះរាជអាជ្ញារង គុ​ជ គឹមឡុង ដឹកនាំកម្លាំងជាង២០០នាក់ យកគ្រឿងចក្រទៅវាយកម្ទេចចោលរបងថ្មរបស់លោក មាស សាវឿន អតីតអភិបាលរងខេត្តព្រះវិហារ ដែលសង់រំលោភលើដីប្រជាពលរដ្ឋ នៅខណ្ឌឬស្សីកែវ

826 Views
January 5, 2018

នៅព្រឹកថ្ងៃទី៥ ខែមករា ឆ្នាំ២០១៨នេះ លោក គុជ គឹមឡុង ព្រះរាជអាជ្ញារងអមសាលាដំបូងរាជធានីភ្នំពេញ បានដឹកនាំកម្លាំងគណៈបញ្ជាការឯកភាពខណ្ឌឬស្សីកែវ (នគរបាល អាវុធហត្ថ ប្រជាការពារ និងមន្រ្តីមូលដ្ឋាន) ជាង២០០នាក់ ដោយយកគ្រឿងចក្រចុះទៅវាយកម្ទេចចោល របងថ្មដ៏រឹងមាំរបស់លោក មាស សាវឿន អតីតអភិបាលរងខេត្តព្រះវិហារ ដែលសង់រំលោភទៅលើដីរបស់ ប្រជាពលរដ្ឋនៅក្បែរខាង។

 

 

 

 

ការចុះវាយកម្ទេចរបងថ្មដ៏រឹងមាំខាងលើនេះ បានធ្វើឡើងក្រោមការដឹកនាំបញ្ជាផ្ទាល់ពីលោក ប្រាជ្ញ សីហា និងលោក ស៊ូ សាគន្ធ អភិបាលរងខណ្ឌឬស្សីកែវ តំណាងលោក ជា ពិសី អភិបាលខណ្ឌ ស្ថិតនៅក្នុងតំបន់អភិវឌ្ឍន៍ឫស្សីកែវ ភូមិទួលពពែ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ដោយមានការចូលរួមពីថ្នាក់ដឹកនាំ និងមន្រ្តីពាក់ព័ន្ធជាច្រើននាក់ផ្សេងទៀត។

 

 

 

 

សូមបញ្ជាក់ថា លោក មាស​ សាវឿន បានរងនូវការចោទប្រកាន់ថា បានរំលោភយកដីរបស់ស្រ្តីម្នាក់ឈ្មោះ លឹម វណ្ណា មួយកន្លែង ដោយធ្វើរោងយាមចាំដី ចាក់បំពេញអាចម៍ដីបន្ថែម និងសាងសង់របងថ្មរឹងមាំ ទាំងថ្ងៃ ទាំងយប់ បើទោះបីស្ត្រីវ័យចំណាស់រូបនេះ មានលិខិតកាន់កាប់ស្របច្បាប់ត្រឹមត្រូវជាយូរឆ្នាំមកហើយ ដោយមានការទទួលស្គាល់ពីអាជ្ញាធរ និងមន្រ្តីជំនាញគ្រប់លំដាប់ថ្នាក់ក៏ដោយនោះ។

 

 

 

 

កាលពីពេលថ្មីៗនេះអាជ្ញាធរខណ្ឌឬស្សីកែវ ធ្លាប់បានទុកពេល១ខែ ជូនលោក មាស សាវឿន ដើម្បីវាយកម្ទេចរបងថ្មីរបស់ខ្លួនដែលសង់រំលោភនោះ ប៉ុន្តែឆ្លងផុតទៅមួយខែ នៅតែមិនទាន់អនុវត្តទៀត រហូតកម្លាំងអាជ្ញាធរ និងសមត្ថកិច្ច ក្រោមការសម្របសម្រួលពីតំណាងអយ្យការចុះមកអនុវត្តផ្ទាល់នៅថ្ងៃនេះតែម្តង។

 

 

 

 

អ្នកស្រី លឹម វណ្ណា បានអះអាងថា ដីទំនាស់នេះ មាន​ទំហំ​១២០០០ម៉ែត្រការ៉េនេះ គាត់បានទិ​ញដោយ​ស្រប​ច្បាប់​ពីលោ​ក លឹម អាន ចំនួនក្បាលដី៦០ម៉ែត្រ មានជម្រៅ២០០ម៉ែត្រ នៅក្នុងឆ្នាំ១៩៩៩មកម្ល៉េះ និងមានទាំងឯកសារពី​អាជ្ញាធរ​ ភូមិ​ សង្កាត់ ​ខណ្ឌដឹងឮ​ និងទទួលស្គាល់ត្រឹមត្រូវ ជាពិសេសលោក មាស សាវឿន ដែលធ្លាប់មានរឿងអាស្រូវជាប់ពន្ធនាគាររឿងដីធ្លី បានលក់ដីរបស់ខ្លួនអស់ទៅហើយចំនួន១២៥ម៉ែត្រ និងជម្រៅ២០០ម៉ែត្រ ដែលនៅខាងកើតជាប់ក្បាលដីរបស់ឈ្មោះ លឹម អាន ជាពិសេសលោក មាស សាវឿន បានផ្ដិតមេដៃទទួលស្គាល់ព្រុំដីនៅចំពោះមុខមេភូមិ និងអនុប្រធានភូមិ ក្នុងឆ្នាំ២០០០មក ស្រាប់តែប្តឹងចោទ​ឈ្មោះ លឹ​ម អាន ថា​លួចយក​ដីលក់ ដើម្បី​ដណ្ដើម​ដីរបស់​គាត់​ដែល​ទិញ​ដោយ​ស្រប​ច្បាប់ ទើបមានការប្ដឹងផ្ដល់គ្នារហូតដល់អំឡុងឆ្នាំ២០១៦។ ករណីនេះត្រូវបានព្រះរាជអាជ្ញារងអមសាលាដំបូងរាជធានីភ្នំពេញ លោកស្រី ស៊ី វណ្ណនី ធ្វើការកោះហៅឲ្យលោក ប៉ុល ឌីម ជាមេភូមិទួលគោក និងលោក ស៊ុន លឹមសេង អនុប្រធានភូមិ ស្ថិតក្នុងសង្កាត់ទួលសង្កែ ខណ្ឌឫស្សីកែវ ឲ្យចូលខ្លួនមកបំភ្លឺបញ្ជាក់ជុំវិញករណីពិនិត្យស្នាមមេដៃលើលិខិតលក់-ទិញដី និងទទួលស្គាល់ព្រុំជាប់ដីទាំងសង្ខាង ដើម្បីបញ្ចប់បញ្ហា ហើយបានរកឃើញថា ពិតជាស្នាមមេដៃលោក មាស សាវឿន ប្រាកដមែន ពោលគឺលោក មាស សាវឿន មិនមានដីនៅទីតាំងនោះទៀតទេ។

 

 

 

 

លោកស្រី ​លឹម ​វណ្ណា ​បន្តថា កាលពីអំឡុងថ្ងៃទី​១៥ ខែតុ​លា ឆ្នាំ២០១៧កន្លងទៅ ត្រូវបានក្រុមគ្រួសារលោកស្រី ថាច់​ ស៊ី សុ​ម៉ា ប្រមាណជិត១០នាក់ ដែលអ្នកយាមដីឲ្យលោក មាស សាវឿន បាន​នាំគ្នាមកសា​ងសង់រោ​ងឈើចាំដីរំលោ​ភយក​ដីរបស់គាត់ ប៉ុន្តែគាត់​បាន​ប្តឹង​ភ្លាមៗ ទៅអាជ្ញាធរខណ្ឌឬ​ស្សីកែវ ឲ្យ​ជួយ​អន្តរា​គមន៍​ចុះមក​រុះរើ ​​តែត្រូវ​ម្ចាស់​សុំពន្យា​ពេល៕

 

 

 

 

 

 

 

 

 

 

 

 

 

 

 

 

 

 

 

 

 

 

 

 

ប្រភព៖ freshnews

 

ព័ត៌មានផ្សេងៗ៖

មេក្លោងបាញ់ប្រហារនៅមណ្ឌលកម្សាន្ត Rock ត្រូវបានសមត្ថកិច្ចចាប់ខ្លួនបានហើយ នៅខេត្តឧត្តរមានជ័យ

http://www.mekongjournal.com/posts/59017

Facebook Comment

Related Articles