វគ្គបណ្តុះបណ្តាលនិស្សិតកម្ពុជាដើម្បីប្រែក្លាយជាអ្នកដឹកនាំសម័យបដិវត្តឧស្សាហកម្មទី៤ |

671 Views

December 28, 2018

កាលពីថ្ងៃទី១៥ ដល់២៧ ខែវិច្ឆិកាឆ្នាំ២០១៨ កន្លងទៅនេះ ក្រុមហ៊ុន Smart Axiata បានរៀបចំកម្មវិធីអភិវឌ្ឍនិស្សិតសាកលវិទ្យាល័យ (University Student Development Program/USDP) នៅខេត្តសៀមរាបដោយមានការសហការពី ក្រសួងអប់រំយុវជន និងកីឡា និងក្រសួងប្រៃសនីយ៍ និងទូរគមនាគមន៍។ កម្មវិធីនេះត្រូវបានរៀបចំសម្រាប់និស្សិតសាកលវិទ្យាល័យរដ្ឋ និងឯកជន ក្នុងបំណងផ្ដល់ឱកាសអភិវឌ្ឍបទពិសោធន៍ការងារ និងបុគ្គលិក លក្ខណៈដល់និស្សិតដែលចូលរួម។

ក្នុងរយៈពេល១៣ថ្ងៃនេះ និស្សិតពីសាកលវិទ្យាល័យនានាក្រៅតែពីរៀនសូត្រពីអ្នកជំនាញផ្នែកជំនួញ ភាពជាអ្នកដឹកនាំ និងបច្ចេកវិទ្យាឌីជីថលហើយនោះ ក៏បានចូលរួមប្រកួតប្រជែងវិញ្ញាសាជាក្រុមផ្សេងៗរួមមាន វិញ្ញាសាគំនិតអាជីវកម្ម វិញ្ញាសាផ្នែកហរិញ្ញវត្ថុ វិញ្ញាសាគណៈគ្រប់គ្រងរបស់ក្រុមហ៊ុន និងវិញ្ញាសាសន្និសីទកាសែត។ វិញ្ញាសាគំនិតអាជីវកម្មតម្រូវឱ្យនិស្សិតដែលចូលរួមធ្វើផែនការអាជីវកម្មទាក់ទងនឹងផលិតផលណាមួយ ដើម្បីវាយលុកទីផ្សារប្រទេសថៃ។្ វិញ្ញាសាផ្នែកហិរញ្ញវត្ថុ តម្រូវឱ្យអ្នកចូលរួមកំណត់ផែនការចំណូលចំណាយ។ វិញ្ញាសារគណៈគ្រប់គ្រងក្រុមហ៊ុនតម្រូវឱ្យអ្នកចូលរួមដើរតួជា អគ្គនាយកប្រត្តិបត្តិ អគ្គនាយកផ្នែកប្រតិបត្តិការ អគ្គនាយកផ្នែកហិរញ្ញវត្ថុរបស់ក្រុមហ៊ុនមួយជាដើម។ ចំណែកឯវិញ្ញាសាសន្និសីទកាសែតវិញ អ្នកចូលរួមត្រូវដើរតួជាតំណាងក្រុមហ៊ុន និងឆ្លើយសំណួរអ្នកកាសែត ម្ចាស់ភាគហ៊ុន រដ្ឋាភិបាល ក៏ដូចជាសមាជិកគ្រួសារជនរងគ្រោះពីបញ្ហាបច្ចេកទេសរបស់ពោងសុវត្ថិភាពក្នុងរថយន្ត ដែលពោងសុវត្ថិភាពនេះជាផលិតផលរបស់ក្រុមហ៊ុននិស្សិតដែលចូលរួម។

កញ្ញា កែវ ព្រីយ៉ានីត្យ និស្សិតឆ្នាំទី៤ជំនាញវិទ្យាសាស្ត្រនយោបាយ និងទំនាក់ទំនងអន្តរជាតិ ពីសាកលវិទ្យាល័យអន្តរជាតិផារ៉ាហ្គន (អតីតសាកលវិទ្យាល័យ ហ្សាម៉ាន់) ថ្លែងថា កញ្ញាបានរៀនសូត្រជាច្រើនពីកម្មវិធីUSDPនេះ ជាពិសេសទាក់ទងនឹងភាពជាអ្នកដឹកនាំ ក៏ដូចជាការស្វែងយល់ពីខ្លួនឯង។ ក្នុងភាពជាអ្នកដឹកនាំ ព្រីយ៉ានិត្យបានយល់ដឹងពីរបៀបកំណត់គោលដៅក្រុម របៀបបង្កើតវប្បធម៌ក្រុម និងបំណិននៃការស្ដាប់ក្នុងការងារជាក្រុមជាដើម។ សម្រាប់ការស្វែងយល់ពីខ្លួនឯងវិញ ព្រីយ៉ានីត្យ មានជំនឿទុកចិត្តលើខ្លួនឯងជាងមុន ដោយសារតែកញ្ញាបានទទួលដំបូន្មាន រង្វាយតម្លៃការងារល្អ ក៏ដូចជាការចែករំលែកបទពិសោធន៍ពីរៀមច្បង ដែលជាអ្នកបណ្ដុះបណ្ដាលក្នុងកម្មវិធី។

លោក ពៅ សុខខុម និស្សិតឆ្នាំទី២ ជំនាញគ្រប់គ្រងប្រព័ន្ធព័ត៌មានវិទ្យា ពីសាកលវិទ្យាល័យអន្តរជាាលតិផារ៉ាហ្គន ដែលបានចូលរួមកម្មវិធីUSDPដែរនោះ បានលើកឡើងថា លោកបានដាក់ពាក្យចូលរួមកម្មវិធីនេះដោយសារតែទទួលបានព័ត៌មានពីមិត្តភក្ដិ។ លើសពីនេះ លោកក៏ចង់ចូលរួមកម្មវិធីនេះដើម្បីអភិវឌ្ឍសមត្ថភាពរបស់ខ្លួនផងដែរ។ កម្មវិធីនេះបានដាក់សម្ពាធច្រើនដល់សុខខុម ដែលលោកត្រូវជំនះ ឧទាហរណ៍ដូចជា ពេលវេលាកម្មវិធីមានភាពមមាញឹក និងខើចសម្រាប់ត្រៀមខ្លួនក្នុងវិញ្ញាសារនិមួយៗ ការត្រូវសម្របខ្លួនជាមួយសមាជិកក្រុមថ្មីដែលខ្លួនមិនទាន់ស្គាល់ ការធ្វើការដើម្បីជ័យជំនះក្រុមក្នុងរយៈពេល១៣ថ្ងៃ និងត្រូវពង្រឹងសមត្ថភាពផ្ទាល់ខ្លួនដើម្បីឆ្លងកាត់វិញ្ញាសានិមួយៗក្នុងពេលតែមួយជាដើម។

កញ្ញា ហួន ចាន់ដេវីផា និស្សិតឆ្នាំទី៣ ជំនាញគ្រប់គ្រងពាណិជ្ជកម្មពីសាកលវិទ្យាល័យអន្តរជាតិផារ៉ាហ្គនដូចគ្នាដែរ បានកត់សម្គាល់ថាអ្នកចូលរួមកម្មវិធីនេះសុទ្ធតែជានិស្សិត ដែលមានសក្ដានុពលខ្ពស់ ក៏ដូចជាខិតខំស្វែងយល់ និងរៀនសូត្រពីគ្នាទៅវិញទៅមក។ ការចូលរួមកម្មវិធី USDPនេះ ជាបទពិសោធន៍ដ៏ថ្មីសន្លាងរបស់ វីផា ហើយបើទោះជាទទួលរងសម្ពាធខ្លាំងពីកម្មវិធី វីផា យល់ថាកម្មវិធីនេះជាកម្មវិធីដ៏ល្អមួយដែលគួរតែយកមកអនុវត្តក្នុងថ្នាក់រៀនរបស់សាកលវិទ្យាល័យ។ វីផា គ្រោងស្នើការរៀបចំកម្មវិធីរបៀបនេះ មកអនុវត្តនៅក្នុងម៉ោងធនធានមនុស្ស ដែលស្ថិតនៅក្រោមដេប៉ាតឺម៉ង់គ្រប់គ្រងពាណិជ្ជកម្ម របស់សាកលវិទ្យាល័យអន្តរជាតិផារ៉ាហ្គន។

គួរបញ្ជាក់ដែរថា និស្សិតទាំងបីរូបរបស់សាកលវិទ្យាល័យអន្តរជាតិផារ៉ាហ្គន ស្ថិតនៅក្នុងចំណោមនិស្សិត៨រូប ដែលទទួលបានឱកាសចូលរួមហ្វឹកហាត់ការងារនៅក្រុមហ៊ុនAxiata ប្រទេសម៉ាឡេស៊ីរយៈពេល២ខែ។ ក៏មានផងដែរនិស្សិតឯទៀតមកពីសាកលវិទ្យាល័យរដ្ឋ និងឯកជនមួយចំនួនដូចជា វិទ្យាស្ថានបច្ចេកវិទ្យាកម្ពុជា វិទ្យាស្ថានបច្ចេកវិទ្យាគិរីរម្យ និងវិទ្យាស្ថានពាណិជ្ជសាស្ត្រអេស៊ីលីដាជាដើម។ និស្សិតមួយចំនួនក្នុងចំណោមនិស្សិតឆ្នើមទាំង៨រូបនោះ ក៏ជាសមាជិកក្រុមដែលមានសមត្ថភាពការងារល្អបំផុត និងសមាជិកក្រុមឈ្នះវិញ្ញាសាគណៈគ្រប់គ្រងក្រុមហ៊ុនផងដែរ៕