លោកបណ្ឌិតសាស្រ្តាចារ្យ ស៊ុយ សារ៉េតដែលជាអ្នកបើកបររថយន្តត្រូវបានក្រុមពលរដ្ឋព្រួតវាយកាលពីម្សិលមិញនេះនៅកំពុងរស់រាន្តមានជីវិតនៅឡើយទេ ខណៈពេលដែលមានព័ត៌មានមួយចំនួនបានចុះផ្សាយថាលោកបានទទួលមរណៈភាពទៅហើយ។

ទោះបីជាយ៉ាងណាក៏ដោយតាមរយៈគណនីហ្វេស ប៊ុកលោក ផែង វណ្ណៈដែលជាមន្រ្តីល្បីល្បាញមួយរូបផងដែរបានសរសេរថា ខណៈពេលនេះលោកបណ្ឌិត ស៊ុយ សារ៉េតកំពុងតែស្ថិតនៅក្នុងបន្ទប់សង្គ្រោះបន្ទាន់នៅក្នុងមន្ទីពេទ្យក្នុងទីក្រុង ហ៊ូជីមិញប្រទេសវៀតណាមនៅឡើយទេ។

រំលឹកថាកាលពីល្ងាចថ្ងៃទី ១១ ម្សិលមិញនេះ មានករណីគ្រោះថ្នាក់ចរាចរណ៍មួយបានកើតឡើងបង្ករជាការភ្ញាក់ផ្អើលនៅក្នុងរាជធានីភ្នំពេញ  ដោយវាបានក្លាយទៅជាការបង្ករហិង្សារ ក្រោយប្រជាជនបានវាយទៅលើរថយន្តមួយគ្រឿងដែលត្រូវបានគេអះអាងថាបង្ករគ្រោះថ្នាក់ហើយបើករត់។

យ៉ាងណាមិញអ្នកបើកបររថយន្តត្រូវបានគេស្គាល់អត្តសញ្ញាណថាជាបណ្ឌិតសាស្រ្តាចារ្យនៅក្នុងសកលវិទ្យាល័យមួយក្នុងរាជធានី ដែលលោកមានឈ្មោះថា ស៊ុយ សារ៉េត បានទទួលរងរបួសយ៉ាងធ្ងន់ធ្ងរ និងត្រូវបានក្រុមគ្រួសារបញ្ជូនទៅជួយសង្គ្រោះក្នុងប្រទេសវៀតណាម ដែលរហូតមកដល់ពេលនេះលោកកំពុងតែស្ថិតនៅក្នុងការសង្គ្រោះបន្ទាន់នៅឡើយ៕