បន្ទាប់ពីការសាកល្បងមីស៊ីលឆ្លងទ្វីបជាថ្មីកាលពីពីយប់មិញ ប្រទេសកូរ៉េខាងជើងបានប្រកាសថាមីស៊ីលចុងក្រោយរបស់ខ្លួនអាចបាញ់កម្ទេចសហរដ្ឋអាមេរិកបានទាំងស្រុង នេះបើយោងតាមការផ្សាយតាមរយៈទូរទស្សន៍ជាតិកូរ៉េខាងជើងអះអាង។

Hwasong-15 ត្រូវបានគេដឹងថាជាមីស៊ីលដែលប្រទេសកូរ៉េខាងជើងបាញ់សាកល្បងកាលពីយប់មិញ ហើយជាពិសេសអ្វីដែលគួរឲ្យកត់សម្គាល់នោះ គឺមីស៊ីលលើកចុងក្រោយរបស់ប្រទេសកូរ៉េខាងជើងបានបង្ហាញនូវឥទ្ធិពលដ៏ខ្លាំងក្លាជាងការសាកល្បងលើកមុនៗទៅទៀត។

យ៉ាងណាមិញសហរដ្ឋអាមេរិកដែលមានលោកប្រធានាធិបតី Trump ជាមេដឹកនាំ បានបង្ហាញប្រតិកម្មខ្លាំងៗ ជាមួយនឹងការលើកឡើងសន្យាថា លោកនឹងមិនបណ្តោយឲ្យប្រទេសកូរ៉េខាងជើងធ្វើតាមទំនើងចិត្តបន្តទៀតនោះទេ។

ជាមួយគ្នានេះដែរការសាកល្បងមីស៊ីលឆ្លងទ្វីបរបស់ប្រទេសកូរ៉េខាងជើងគឺមានសភាពខុសប្លែកពីការសាកល្បងលើកមុនៗ ដោយមីស៊ីលដែលប្រទេសកូរ៉េខាងជើងសាកល្បងកាលពីយប់គឺអាចមានកម្លាំងបាញ់បានរយៈចម្ងាយ 950 គីឡូម៉ែត្រ ក្នុងរយៈពេល 53 នាទី ដែលនេះជាសញ្ញាបង្ហាញថាមីស៊ីលចុងក្រោយនេះគឺមានអនុភាពខ្លាំងជាងមីស៊ីលរាល់ដងដែលកូរ៉េខាងជើងធ្លាប់បាញ់។

គួរបញ្ជាក់ថាមុនពេលបាញ់សាកល្បងមីស៊ីលលើកចុងក្រោយរបស់ខ្លួន មន្រ្តីនាំពាក្យជាន់ខ្ពស់ទីក្រុងព្យុងយ៉ាងម្នាក់បានបញ្ជាក់ថា គោលដៅរបស់មីស៊ីលឆ្លងទ្វីបកូរ៉េខាងជើងគឺជាសហរដ្ឋអាមេរិកតែមួយគត់ ហើយជាពិសេសកូរ៉េខាងជើងបានហៅមីស៊ីលរបស់ខ្លួនថា “មីស៊ីលយុត្តិធម៌”៕

ប្រភព៖ BBC

ដោយ៖ វិសាល