រឿងប៉ងបាញ់សម្លាប់ឧកញ៉ា ថុង អ៊ុយប៉ាង តុលាការកំពូល ប្រកាសសាលដីកាថ្ងៃទី៦ធ្នូ

353 Views
November 29, 2017

ក្រោយ​បញ្ចប់​សវនាការ​ នៅ​ថ្ងៃទី​២៩​ ខែ​វិច្ឆិកា​ ឆ្នាំ២០១៧នេះ តុលាការ​កំពូលបាន​សម្រេចប្រកាស សាលដីកា​នៃសំណុំរឿង ​​លោក ​ហេង​ ពៅ​ អតីត​ស្នងការ​នគរបាល​ក្រុង​ភ្នំពេញ​ និង​កូន​ចៅ​ ពាក់ព័ន្ធ​បទល្មើស​ប៉ុនប៉ង​បាញ់​សម្លាប់​ ឧកញ៉ា​ថុង​ អ៊ុយប៉ាង​ ចាងហ្វាង​កាសែត​កោះ​សន្តិភាព​ នៅ​ថ្ងៃ​ទី​០៦​ ខែ​ធ្នូ​ ខាងមុខ​នេះ​។

 

 

នៅក្នុងសវនាការ​ ជនជាប់ចោទ​នៅ​តែ​បដិសេធ​ថា​ ពុំ​បាន​ប្រព្រឹត្ត​ដូច​ការ​ចោទប្រកាន់​នោះទេ​ ហើយ​ទាមទារ​ឱ្យ​តុលាការ​កំពូល​ កោះ​ហៅ​សាក្សី​មក​បំភ្លឺ​បន្ថែម​ទៀត​។ ក្នុង​រឿង​ក្ដី​នេះ ជនជាប់ចោទ​​មាន​បី​នាក់​ គឺ​ លោក​ ហេង​ ពៅ​ អតីត​ស្នងការ​នគរបាល​ក្រុង​ភ្នំពេញ​ លោក​ លី​ រ៉ាស៊ី​ អតីត​អនុប្រធាន​ការិយាល័យ​ព្រហ្មទណ្ឌ​កម្រិត​ស្រាល​ និង​ លោក​ ផេង​ ផៃ​ អតីត​ប្រធាន​ការិយាល័យ​ជនបរទេស​នៃ​ស្នងការ​ក្រុង​ភ្នំពេញ​​ ។ សាច់ញាតិ​ជនជាប់ចោទ​ឈ្មោះ​ លី​ រ៉ាស៊ី​ អះអាង​ថា​ លី​ រ៉ាស៊ី​ ពុំ​បាន​ប្រព្រឹត្ត​បទល្មើស​ដូច​ការ​ចោទប្រកាន់​នោះទេ​ អ្វីៗ​ទាំងអស់​សុទ្ធ​តែ​ជា​ការ​ទម្លាក់​កំហុស​ ។​

 

 

សូមបញ្ជាក់ថា ក្នុងសំណុំរឿងមួយ​នេះ​ សាលា​ដំបូង​រាជធានី​ភ្នំពេញ​ និង​ សាលាឧទ្ធរណ៍​ ផ្តន្ទា​ទោស​ក្រុម​ជនជាប់ចោទ​ដាក់​ពន្ធនាគារ​ចន្លោះ​ពី​១៦ឆ្នាំ​ទៅ​១៨ឆ្នាំ​ និង​សង​សំណង​ជំងឺ​ចិត្ត​ដល់​ដើម​បណ្ដឹង​រាប់​ម៉ឺន​ដុល្លារ​អាមេរិក​ ក្រោម​ការ​ចោទប្រកាន់​ពី​បទ «ប៉ុនប៉ង​សមគំនិត​ឃាតកម្ម​គិត​ទុក​ជា​មុន​» ​ប្រព្រឹត្ត​នៅ​ចំណុច​វត្ត​ទឹក​ថ្លា​ សង្កាត់​ទឹកថ្លា​ ខណ្ឌ​ឫស្សីកែវ​ កាលពី​ថ្ងៃទី​០៨​ ខែ​មិថុនា​ ឆ្នាំ​១៩៩៨។

 

 

តាម​អង្គ​ហេតុ គឺ​ កាល​ពី​ព្រឹ​កថ្ងៃ​ទី​០៨​ ខែ​មិថុនា ឆ្នាំ​១៩៩៨ មាន​ជន​ប្រដាប់​អាវុធពីរ​នាក់ បានបាញ់​ប្រហារ​លើ​ ឧកញ៉ា​ថុង អ៊ុយប៉ាង ក្នុង​កម្មវិធី​បុណ្យ​នៅ​វត្ត ទឹក​ថ្លា ត្រូវ​ចំពីរ​គ្រាប់​របួស​ តែ​អង្គរក្ស​លោក​បាន​បាញ់​ត​ត្រូវ​ជន​ល្មើសមួយ​គ្រាប់​របួស​ដៃ​ឆ្វេង​។​ ក្រោយ​មក​ ពុំ​ទាន់​មាន​ការ​ចាប់​ខ្លួន​ជនល្មើស​ទេ។ ជាការ​កត់សម្គាល់ គ្រប់​ដំណាក់កាល​ទាំងអស់ លោក ហេង ពៅ និង​ កូនចៅ​ តែងតែ​បដិសេធថា ពុំបាន​ប្រព្រឹត្ត​ដូច​ការចោទប្រកាន់​នោះទេ៕

 

ប្រភព៖​ Fresh News

Facebook Comment

Related Articles