ភ្លាមៗនៅព្រឹកថ្ងៃទី០១ ខែធ្នូ ឆ្នាំ២០១៧នេះ អ៉ីម៉ែល (Account Gmail) របស់លោក ពេជ្រ ស្រស់ ប្រធានគណបក្សយុវជនកម្ពុជា ត្រូវបានក្រុម Hacker លួយយកទៅគ្រប់គ្រង និងបន្តលួចចូលគ្រប់គ្រង Facebook ទៀត ដែលករណីនេះកើតឡើងនៅវេលាម៉ោង៣៖៤១នាទីព្រឹកថ្ងៃសុក្រនេះ។

លោក ពេជ្រ ស្រស់ បានប្រកាសនៅលើបណ្តាញ Facebook ថា «កាលពីព្រឹកមិញម៉ោងប្រមាណ៣៖៤១នាទីជិតភ្លឺមានក្រុមចោរបានលួច Account Gmail របស់ខ្ញុំទៅបាត់ហើយគោលបំណង របស់ក្រុមនោះគឺចង់ចូលគ្រប់គ្រង Account Facebook របស់ខ្ញុំ ក្នុងន័យនេះ ខ្ញុំ ពេជ្រ ស្រស់ សូមជូនដំណឹងដល់ សាធារណៈជនឲ្យជ្រាប់ថា៖ នៅពេលខាងមុខបើសិនមានសារនយោបាយញុះញង់ណាមួយកើតឡើង ឬសារគ្មានសីលធម៌នៅលើបណ្តាញ Account Facebook ផ្ទាល់ខ្លួនរបស់ខ្ញុំនោះ គឺខ្ញុំបដិសេធទាំងស្រុងពីព្រោះសារទាំងនោះ មិនបានឆ្លុះបញ្ចាំងអំពីទស្សនៈផ្ទាល់ខ្លួនរបស់ខ្ញុំឡើយ»។

លោក ពេជ្រ ស្រស់ ជាមេដឹកនាំគណបក្សមួយ ដែលបានចូលរួមដាក់ពាក្យប្តឹងរំលាយគណបក្សសង្រ្គោះជាតិ នាពេលថ្មីៗជាមួយគណបក្សហ្វ៊ុនស៊ិនប៉ិច ហើយកាលពីថ្ងៃទី១៦​ ខែវិច្ឆិកា ឆ្នាំ២០១៧កន្លងទៅតុលាការកំពូល បានកាត់រំលាយគណបក្សសង្រ្គោះជាតិ ព្រមទាំងបិទសិទ្ធិធ្វើនយោបាយរយៈពេល៥ឆ្នាំ ចំពោះមន្រ្តីសំខាន់ៗរបស់គណបក្សមួយនេះផងដែរ។

ប្រភព៖ freshnews