ប្រទេសជប៉ុនបានចេញសេចក្តីថ្លែងការណ៍ប្រឆាំងទៅកាន់ស្ថានទូតចិនប្រចាំទីក្រុងតូក្យូ បន្ទាប់ពីវត្តមានរបស់នាវាចម្បាំងចិនបង្ហាញវត្តមាននៅក្បែរនឹងតំបន់ ឆ្នេរសមុទ្រភាគខាងកើតដែលប្រទេសទាំង ២ កំពុងតែមានជម្លោះ ជាមួយនឹង ប្រទេសជប៉ុន។

តាមរយៈរបាយការណ៍ពីកងឆ្មាំសមុទ្រជប៉ុនបានឲ្យដឹងថាកាលពីថ្ងៃពុធ និងថ្ងៃ ព្រហស្បត្តិ៍មាននាវាមុជទឹកដែលខ្លួនមិនអាចមើលស្គាល់ថាជារបស់ប្រទេសមួយណា បានបង្ហាញខ្លួនក្នុងតំបន់កំពុងតែមានជម្លោះ។ ហើយនៅថ្ងៃដដែលក៏មាន វត្តមាននាវាចម្បាំងប្រទេសចិនបង្ហាញខ្លួនតែម្តង។

យ៉ាងណាមិញជម្លោះដែនកោះរវាងប្រទេសទាំងពីរគឺបានបន្តរ៉ាំរ៉ៃអស់រយៈពេលជាយូរណាស់មកហើយ ដោយភាគីទាំងសងខាង ចិន ជប៉ុន បានដាក់ឈ្មោះឲ្យកោះដែលកំពុងតែមានជម្លោះនេះរៀងៗខ្លួនពោលគឺប្រទេសចិនបានហៅវាថា Diaoyu ហើយប្រទេសជប៉ុនបានហៅវាថា Senkaku។

គួរបញ្ជាក់ថាជារឿយៗប្រទេសចិនតែងតែបញ្ជូនកងកម្លាំងរបស់ខ្លួនទៅតាមតំបន់ដែលកំពុងតែមានជម្លោះ ខណៈដែលប្រទេសជប៉ុននៅតែបន្តការចេញសេចក្តីថ្លែងការណ៍ទៅកាន់ស្ថានទូតចិនប្រចាំទីក្រុងតូក្យូជាការព្រមាន៕

ប្រភព៖ bbc