ធនាគារជាតិនៃកម្ពុជា និងធនាគារកណ្ដាលឡាវ បានរួមគ្នាប្ដេជ្ញាពង្រឹងកិច្ចសហប្រតិបត្តិការ រវាងគ្នានិងគ្នាបន្ថែមទៀតដើម្បីធ្វើយ៉ាងណាឲ្យ​ការវិវត្តន៍ នៃវិស័យធនាគារនៃប្រទេសទាំងពីរ កាន់តែ​មានភាពល្អប្រសើរឡើងពីមួយឆ្នាំទៅមួយឆ្នាំ ក៏ដូចជារឹតបន្ដឹងចំណងមិត្តភាពរវាងប្រទេសទាំង​ពីរឲ្យាកាន់តែស្អិតរមួតផងដែរ។

ការរួមគ្នាប្ដេជ្ញារវាងធនាគារទាំងពីរនេះ ធ្វើឡើងក្នុងកិច្ចប្រជុំទ្វេភាគី កម្ពុជា-ឡាវ នាពេលថ្មីៗនេះ ក្នុងឱកាសដែល​​គណៈប្រតិ​ភូធនាគារកណ្ដាលឡាវ មកធ្វើទស្សនកិច្ចសិក្សានៅក្នុងប្រទេសកម្ពុជា។ អង្គប្រជុំទ្វេរភាគីនេះក៏មានការអញ្ជើញចូលរួមពីលោក ជា ចាន់តូ ទេសាភិបាល​ធនាគារជាតិនៃកម្ពុជា និងលោក SOMPHAO PHAYSITH ទេសាភិបាលធនាគារឡាវ រួមទាំងមន្ដ្រីធនាគារកម្ពុជា និងមន្ដ្រីធនាគារឡាវ​ជាច្រើនរូបទៀតផង។

លោក ជា ចាន់តូ បានថ្លែងឲ្យដឹងថា តាមការកត់សម្គាល់ឃើញថា កិច្ចសហប្រតិបត្តិការ របស់ធនាគារកណ្ដាលប្រទេសទាំងពីរ ពិតជាទទួល​បាន​ការរីកចម្រើនល្អប្រសើរឡើងពីមួយឆ្នាំទៅ១ឆ្នាំ។ សម្រាប់អង្គប្រជុំថ្ងៃនេះក៏សបញ្ជាក់ថែមទៀតពីឆន្ទៈ នៃការបន្ដពង្រឹង និងពង្រីកកិច្ចសហប្រតិបត្តិ​ការ​រវាងធនាគារទាំងពីរ។

លោកបានបញ្ជាក់ទៀតថា «ឈរលើមូលដ្ឋាននេះ ខ្ញុំសង្ឃឹមយ៉ាងមុតមាំថា ស្ថាប័នយើង នឹងនៅតែបន្ដវប្បធម៌កិច្ចសហប្រតិបត្តិការ យ៉ាងជិតស្និត​នាពេលអនាគត»។

ក្នុងនោះផងដែរលោក ទេសាភិបាលក៏បានលើកយក ពីសារៈសំខាន់នៃការចុះធ្វើទស្សនកិច្ចរវាងគ្នាទៅវិញទៅមកផងដែរ។ លោកបានលើកឡើង​ថា ការធ្វើទស្សនកិច្ចទៅវិញទៅមកនេះមានសារៈប្រយោជន៍ណាស់ចំពោះ ការបណ្ដុះបណ្ដាល ពង្រឹងសមត្ថភាពជំនាញ ក៏ដូចជាពង្រឹងសាមគ្គីភាព និងមិត្តភាពរវាងមន្ដ្រីនៃធនាគារកណ្ដាលទាំងពីរ ឲ្យកាន់តែជិតស្និតគ្នាបន្ថែមទៀត។

លោក SOMPHAO PHAYSITH ក៏បានបង្ហាញអំពីការវិវត្ត និងស្ថានភាពលេចធ្លោ ពាក់ព័ន្ធនឹងការអភិវឌ្ឍន៍សេដ្ឋកិច្ច ការអនុវត្តន៍គោលនយោបាយរូបបិវត្ថុ និងការគ្រប់គ្រងធនាគារពាណិជ្ជ និងស្ថាប័នមីក្រូហិរញ្ញវត្ថុរបស់ធនាគារ សបប ឡាវ ព្រមទាំងកិច្ចសហប្រតិបត្តិការផ្នែក​បច្ចេកទេស​ជាច្រើន​ផងដែរ៕

ប្រភព៖ freshnews