អាជ្ញាធរជប៉ុនបានប្រកាសថា មនុស្សចាស់កើតជំងឺវង្វេងដើរចោលផ្ទះរាប់ម៉ឺននាក់ក្នុង១ឆ្នាំៗ ហើយបញ្ហានេះកាន់តែកើនឡើងខ្លាំង ដែលអ្នកជំនាញជំរុញឲ្យរដ្ឋាភិបាលត្រូវមានវិធានការដោះស្រាយបន្ទាន់កុំឲ្យរឿងនេះ ក្លាយជាបញ្ហាធំរបស់សង្គម។​

របាយការណ៍របស់ទីភ្នាក់ងារនគរបាលជាតិបានបង្ហាញថា ក្នុងឆ្នាំ២០១៦ មនុស្សចាស់វង្វេងដើរចោលផ្ទះមានជាង១៥ ០០០នាក់ ដែលចំនួននេះកើនឡើង​២៦ភាគរយបើប្រៀបធៀបឆ្នាំ២០១៥។​ នេះបើតាមការចុះផ្សាយរបស់Channel News Asia។​

អ្នកកើតជំងឺវង្វេងស្មារតីដើរតាមផ្លូវនៅជប៉ុន

​របាយការណ៍របស់នគរបាលបង្ហាញថា មនុស្សចាស់ដែលកើតជំងឺវង្វេងហើយដើរចោលផ្ទះនោះ ភាគច្រើន​អាយុចាប់៦៥ឆ្នាំឡើងទៅ។

របាយការណ៍ធនាគារពិភពលោកបង្ហាញថា ក្នុងឆ្នាំ២០១៦ ជប៉ុនមានប្រជាជន​១២៧លាននាក់។​ ទីភ្នាក់ងារនគរបាលជាតិជប៉ុនបង្ហាញការព្រួយបារម្ភថា បច្ចុប្បន្នអ្នកមានជំងឺវង្វេងស្មារតីមាន៤លាន៦សែននាក់ ហើយចំនួននៃជំងឺនេះអាចកើនឡើងដល់៧លាននាក់នៅឆ្នាំ២០២៥។​

បញ្ហាមួយនៅក្នុងប្រទេសជប៉ុនគឺសមាជិកគ្រួសារតែងលាក់បាំងព័ត៌មាន​ ពីស្ថានភាពសមាជិកគ្រួសាររបស់ពួកគេដែលមានជំងឺវង្វេងស្មារតីមិនឲ្យអ្នកជិតខាងដឹងទេព្រោះគេយល់ថា ជារឿងក្នុងគ្រួសារ ឬ ជារឿងខ្មាស់អៀន។​

សមត្ថកិច្ចជប៉ុនតែងតែជួបមនុស្សដើរវង្វេងផ្ទះ នៅតាមផ្លូវសាធារណៈ ដេកតាមចិញ្ចើមថ្នល់ និង​ដើរតាមហាងលក់ទំនិញជាដើម ហើយនៅពេលដែលសមត្ថកិច្ចសួរនាំពួកគេមិនស្គាល់ឈ្មោះ និង​ផ្ទះខ្លួនឯងនោះទេ។ អ្នកខ្លះដើរវង្វេងផ្ទះរហូត៣ទៅ៤ថ្ងៃក្នុងស្ថានភាពអាកាសធាតុត្រជាក់។​

មេធាវីTetsuhiko Kobayashi ដែលកំពុងដឹកនាំអ្នកស្ម័គ្រចិត្តមួយក្រុមជួយស្វែងរកអ្នកមានជំងឺវង្វេងស្មារតីដើរចោលផ្ទះក្នុងទីក្រុងតួក្យួថ្លែងថា បើរដ្ឋាភិបាលមិនដោះស្រាយបញ្ហានេះ ឲ្យបានទាន់ពេលនោះទេវានឹងក្លាយទៅជាបញ្ហាធ្ងន់ធ្ងររបស់សង្គមនៅពេលអនាគត។

អ្នកជំនាញខាងផ្លូវចិត្តក៏ជំរុញឲ្យមានការបង្កើតក្រុមអ្នកជំនាញមួយដើម្បីស្រាវជ្រាវលើបញ្ហាដែលកំពុងកើតមានទាក់ទងជំងឺវង្វេងកើនឡើងច្រើននេះ។​​

ប្រភព៖ vod