លោកស្រី រស់ សោភនីដែលត្រូវបានប្រជាជនខ្មែរស្គាល់យ៉ាងច្បាស់ ជាពិធីការនីជើងចាស់មួយរូបដែលមានទឹកដមសម្លេងយ៉ាងពិរោះរណ្ដំ ក្នុងការអានព័ត៌មាន អន្តរជាតិ សម្រាប់ទូរទស្សន៍ជាតិកម្ពុជា ទទក បានទទួលមរណភាពហើយកាលពីវេលាម៉ោង ១២ ថ្ងៃត្រង់នៅក្នុងប្រទេសបារាំងដោយរោគាពាធ នេះបើយោងតាមបណ្តាញសង្គមរបស់ លោក Om Chetchannara។

យ៉ាងណាមិញខណៈពេលនេះសពរបស់លោកស្រី រស់ សោភនីកំពុងតែស្ថិតនៅក្នុងប្រទេសបារាំងនៅឡើងទេ បន្ទាប់ពីលោកស្រីបានទទួលការព្យាបាលអស់ពេលមួយរយៈនៅក្នុងប្រទេសបារាំង។

គួរបញ្ជាក់ថាលោកស្រី រស់ សោភនីបានចូលនិវត្តន៍ក្នុងការបម្រើការងារពីក្រសួងព័ត៌មាន អស់រយៈពេលជាង ២ ឆ្នាំ កន្លងផុតមកហើយ។ លោកស្រីត្រូវបានអ្នករួមអាជីពខាងវិស័យសារព័ត៌មាន ក៏ដូចជាមហាជនទូរទាំងប្រទេសទទួលស្គាល់អំពីស្នាដៃរបស់លោកស្រីក្នុងការ អត្ថាធិប្បាយព័ត៌មាន អន្តរជាតិ។

ដំណឹងនៃការទទួលមរណៈភាពរបស់លោកស្រីក៏ជារឿងមួយដ៏ក្រៀមក្រំផងដែរ ត្បិតអីការគាំទ្រពីសំណាក់មហាជនទៅលើលោកស្រី នៅតែមានទោះបីជារយៈពេលជាង ២ ឆ្នាំ មកនេះលោកស្រីបានសម្រាកចូលនិវត្តន៍ក៏ដោយ៕

ប្រភព៖ Om Chetchannara