តុលាការចេញដីកាបង្គាប់ឲ្យឃុំខ្លួន មន្រ្តីយោធាពាក់ស័ក្តិ៥ ដែលផ្ទុះអាវុធបណ្តាលឲ្យ អ្នកបើករថយន្តតាក់ស៊ីរងរបួសធ្ងន់​

621 Views
February 23, 2018

(ភ្នំពេញ)៖ លោក ប៊ុន ធី ចៅក្រមស៊ើបសួរនៃសាលាដំបូងរាជធានីភ្នំពេញ នៅល្ងាចថ្ងៃទី២២ ខែកុម្ភៈ ឆ្នាំ២០១៨នេះ បានចេញដីកាបង្គាប់ឲ្យឃុំខ្លួន មន្ដ្រីយោធាពាក់ស័ក្ដិ៥ បម្រើការ​នៅអគ្គនាយកដ្ឋានសម្ភារបច្ចេកទេស​ ដាក់ពន្ធនាគារជាបណ្ដោះអាសន្ន។ នេះបើតាមមន្ដ្រីតុលាការ បានថ្លែងប្រាប់ភ្នាក់ងារ Fresh News ប្រចាំតុលាការ​នៅល្ងាចថ្ងៃនេះ។

មន្ដ្រីតុលាការបានបញ្ជាក់ថា លោក ងិន ពេជ ជាតំណាងអយ្យការ​បានបើកការស៊ើបសួរ និងចោទប្រកាន់លើ ឈ្មោះ ប៉ែន សាយវ័ន្ត ​អាយុ​៣៤ឆ្នាំ មុខរបរ​យោធា មានឋានន្តរស័ក្តិ វរសេនីយ៍ឯក (ស័ក្តិ៥) បម្រើការងារនៅអគ្គនាយកដ្ឋានសម្ភារបច្ចេកទេស នៃក្រសួងការពារជាតិ ពីបទ​ប្រើប្រាស់អាវុធខុសច្បាប់ និងបទ ហិង្សាដោយអចេតនា លើជនរងគ្រោះ មានឈ្មោះ ជុំ គា អាយុ​៤៨ឆ្នាំ មុខរបររត់តាក់ស៊ី មានទីលំនៅ​ភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ ប្រព្រឹត្ត​កាលពីវេលាទាបភ្លឺថ្ងៃទី២០ ខែកុ​ម្ភៈ ឆ្នាំ២០១៨ នៅចំណុច​ម្តុំ​​មុខ​អតីតរោង​កុនអង្គរ ខណ្ឌ៧មករា។​

 

 

 

របាយការណ៍របស់នគរបាល​​បានបញ្ជាក់​ថា កាលពីវេលាទៀបភ្លឺថ្ងៃទី២០ ខែកុ​ម្ភៈ ឆ្នាំ២០១៨ ខណៈជនសង្ស័យបានចេញពីផឹកស៊ីនៅក្លឹបកាហ្សា ក្នុងសង្កាត់ស្រះចក ខណ្ឌដូនពេញ បាន​ហៅរថយន្តតាក់​ស៊ី របស់ជនរងគ្រោះជិះទៅផ្ទះនៅម្តុំស្ពានដែកចំការដូង។ លុះជិះដល់​ចំណុចកើតហេតុ ម្តុំ​មុខ​អតីតរោង​កុនអង្គរខណ្ឌ៧មករា ជនសង្ស័យបាន​ដក​កាំ​ភ្លើង​ខ្លី​ ម៉ាកប្រាហាបណ្តាលឲ្យផ្ទុះ​១​គ្រាប់ ចំជនរងគ្រោះត្រូវច​ង្កេះ​ខាង​ស្ដាំ បណ្ដាល​ឲ្យ​ជនរងគ្រោះ​​របួស​ធ្ងន់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។

 

 

 

ក្រោយបាញ់ជនរងគ្រោះរួច ជនសង្ស័យបានចុះពីរថយន្តរត់គេចខ្លួន ចូលទៅពួននៅជណ្តើរលេខ៦៨ ជាន់ទី២ ផ្លូវ១៦៤ ភូមិ១ សង្កាត់អូរឬស្សី២ ខណ្ឌ៧មករា ហើយត្រូវសមត្ថកិច្ចឃាត់ខ្លួន បានភ្លាមៗតែម្តង ដោយដកហូតបានកាំភ្លើងខ្លីម៉ាកប្រាហា លេខ៥១៨៣៦២ មានបង់មួយ និងគ្រាប់ចំនួន៧គ្រាប់។

 

 

 

សូមបញ្ជាក់ថា គេមិនទាន់ភ្លេចឡើយ នៅព្រឹត្តិករណ៍បាញ់ប្រហារមនុស្សឱ្យរងរបួស នៅក្នុងវង់ផឹកស៊ីរបស់លោកមេធាវី អ៊ិត ពិសិដ្ឋរង្សី ក្បែរភូមិគ្រឹះនាយឧត្តមសេនីយ៍ នេត សាវឿន អគ្គស្នងការនគរបាលជាតិ ក្នុងទឹកដីខណ្ឌ៧មករា កាលពីចុងឆ្នាំ២០១៧ តែពេលថ្មីៗនេះ លោកមេធាវី មានកាំភ្លើងប្រើរូបនេះ ត្រូវបានសាលាឧទ្ធរណ៍ ដោះលែងឱ្យនៅក្រៅឃុំបណ្តោះអាសន្ន៕

 

 

 

 

ប្រភព៖​ freshnews

Facebook Comment

Related Articles