ស្រ្តីម្នាក់នៅក្នុងប្រទេសឥណ្ឌាត្រូវបានជាប់ឈ្មោះជាស្រ្តីជើងខ្លាំង ហ៊ានប្រយុទ្ធគ្នា ជាមួយសត្វខ្លាដោយមិនញញើត ដើម្បីការពារជិវិតសត្វពពែរដែលនាងចិញ្ចឹម ហើយភាពខ្លាំងក្លាហានរបស់នាងកំពុងតែមានភាពល្បីល្បាញស្ទើរពាសពេញប្រទេសឥណ្ឌា។

ស្រ្តីជើងខ្លាំងត្រូវបានគេស្គាល់ឈ្មោះថា Rupali Meshram អាយុ ២៣ ឆ្នាំរស់នៅក្នុង ភូមិ Nagpur ភាគខាងលិចទីក្រុង Maharashtra ប្រទេសឥណ្ឌា ដែលនាងបានប្រទះឃើញសត្វខ្លាកំពុងតែប្រមាញ់ពពែររបស់នាងធ្វើជាចំណី។ បន្ទាប់ពីប្រយុទ្ធគ្នាជាមួយសត្វខ្លាហើយ ស្រ្តីក្លាហានបានត្រលប់មកក្នុងផ្ទះ និងបានថតរូប ស៊ែលហ្វីជាមួយម្តាយ រួចផុសទៅក្នុងបណ្តាញសង្គមទាំងផ្ទៃមុខ ប្រឡាក់ឈាមផងដែរ។

តាមរយៈប្រព័ន្ធផ្សព្វផ្សាយនៅក្នុងប្រទេសឥណ្ឌាបន្តទៀតថា ក្រោយពេលប្រយុទ្ធ នឹងសត្វខ្លា និងថតស៊ែលហ្វីចប់ ស្រ្តី និងម្តាយបានទៅកាន់មន្ទីពេទ្យ ដើម្បីលាងរបួស ហើយរហូតមកទល់នឹងពេលនេះពួកគេទាំង ២ បានជាសះស្បើយ ទាំងស្រុងហើយ។

បញ្ជាក់ថាប្រទេសឥណ្ឌាត្រូវបានគេដឹងថាជាប្រទេសដែលសំបូរសត្វខ្លាស្ទើតែពាក់កណ្តាលពិភពលោក ហើយជារឿយមានប្រជាជនឥណ្ឌាជាច្រើនត្រូវបានរងការវាយ ប្រហារដោយសារវា ដែលក្នុងនោះមានអ្នកស្លាប់ និងទទួលអ្នករបួសជាច្រើន ផងដែរ៕