ជឿជាក់ថា យុវវ័យជាច្រើននាក់កំពុងតែរំភើបសប្បាយរីករាយនឹងបុណ្យភូមិ ដែលធ្វើឡើងនៅ ភូមិព្រែកកំពិស ស្រុកកណ្តាលស្ទឹង នៃទឹកដីខេត្តកណ្តាល នៅក្នុងវត្តគោកអំពិល ដែលចាប់ផ្ដើមពីថ្ងៃទី៦ ដល់ថ្ងៃទី ៨ ខែមេសា នេះហើយ។​

រូបភាព៖ ហ្វេសប៊ុក បុណ្យភូមិ

រូបភាព៖ ហ្វេសប៊ុក បុណ្យភូមិ

ថ្ងៃនេះជាថ្ងៃដំបូងនៃព្រឹត្តិការណ៍នេះតែម្ដង គេសង្កេតឃើញថា វត្តមានមិត្តៗយុវវ័យ ចាប់ផ្ដើមច្រើនកុះករទៅហើយ។ ក្នុងនោះ បន្ថែមលើការនាំយកភាពសប្បាយរីករាយ ការអភិរក្សវប្បធម៌ ប្រពៃណីខ្មែរ សិល្បៈបុរាណ ល្បែងប្រជាប្រិយ ដល់អ្នកចូលរួម បុណ្យភូមិ ក៏បានយកចិត្តទុកដាក់ចំពោះបរិស្ថានផងដែរ។

ក្រុមការងារបុណ្្យភូមិ បានបង្ហោះពីព័ត៌មានណែនាំមួយ អំពីការចោលសំរាមក្នុងធុង ដែលគេមានបែងចែកធុងសំរាមជា៣ប្រភេទ រួមមាន ធុងសំរាមមិនកែច្នៃ ធុងសំរាមអាចកែច្នៃបាន និង ធុងសំរាមសើម។ ដូច្នេះ សូមប្រិយមិត្តដែលទៅចូលរួម សូមកុំភ្លេចចោលសំរាមទៅតាមប្រភេទធុងដូចដែលគេបានដាក់ផងណា! ដើម្បីបរិស្ថានស្អាតរបស់យើងទាំងអស់គ្នា។

យើងសូមកោតសរសើរដល់ក្រុមការងារបុណ្យភូមិ ដែលមិនត្រឹមតែគិតគូររៀបចំកម្មវីធីឲ្យល្អនោះទេ ថែមទាំងគិតដល់ការស្រឡាញ់បរិស្ថានទៀតផង។ ព្រមទាំង សូមជូនពរបងប្អូនដែលទៅចូលរួម ធ្វើដំណើរប្រកបដោយសុវត្ថិភាព និង ទទួលបានភាពសប្បាយរីករាយគ្រប់ៗគ្នា៕