នាង​ហ្គិច​ ដុត​រោងចក្រ​ បង្ក​មហន្តរាយ​ ,​ ព្រះរាជអាជ្ញាចោទប្រកាន់បីបទល្មើស​ បញ្ជូន​ទៅ​ចៅក្រម​ស៊ើបសួរ​

587 Views
April 18, 2018

(កណ្ដាល​)៖​​ ស្ត្រី​ឈ្មោះ​ កែវ​ រតនៈ​ ហៅ​ ហ្គិច​ ដែល​ធ្លាប់​មាន​រឿង​អាស្រូវ​ជាច្រើន ​និង​ធ្លាប់​ជាប់​ពន្ធនាគារ​ផងនោះ​ ឥឡូវ​នេះ​ ត្រូវ​បាន​ព្រះរាជអាជ្ញា​ខេត្ត​កណ្ដាល​ នៅ​ព្រឹក​ថ្ងៃ​ទី​១៨​ ខែ​មេសា​ ឆ្នាំ​២០១៨​ នេះ​ សម្រេច​ចោទប្រកាន់​ចំនួន​បី​បទល្មើស​ រួច​បញ្ជូន​ទៅ​ចៅក្រម​ស៊ើបសួរ​ ចាត់​ការ​បន្ត​តាម​នីតិវិធី​។

មន្ត្រី​តុលាការ​ ថ្លែង​ថា​ នាង​ កែវ​ រតនៈ​ ហៅ​ ហ្គិច​ ត្រូវ​បាន​លោក​ ឯក​ ស៊ុន​រស្មី​ ព្រះ​រាជ​អាជ្ញា​រង​អម​សាលាដំបូង​ខេត្ត​កណ្ដាល​ ចោទប្រកាន់​ពី​បទ ​«ប្រើប្រាស់​ឯកសារ​សាធារណៈ​ក្លែង​ បទ​គំរាមកំហែង​ថា​នឹង​សម្លាប់​ និង​បទ​ធ្វើ​ឱ្យ​ខូចខាត​ដោយ​ចេតនា​មាន​ស្ថាន​ទម្ងន់​ទោស​ដោយសារ​ការ​ប្រើប្រាស់​វិធី​គ្រោះថ្នាក់​ដល់​បុគ្គល» ប្រព្រឹត្ត​នៅ​ចំណុច​រោងចក្រ​ផលិត​គ្រឿង​សង្ហារឹម ​និង​ក្តា​កុង​ផ្លាកេ​ ប្រាយវ៉េ​ ហ្វើនីឈ័រ​ ភូមិ​ទឹក​ជា​ ឃុំ​ពើក​ ស្រុក​អង្គស្នូល​ ខេត្តកណ្តាល​ កាលពី​អំឡុង​ឆ្នាំ​២០១៨​ តាម​មាត្រា​៧៨ច្បាប់​ស្ដីពី​ចរាចរណ៍​ផ្លូវគោក​ និង​តាម​មាត្រា​៦៣០​ មាត្រា​២៣៣​ មាត្រា​៤១៣នៃ​ក្រម​ព្រហ្មទណ្ឌ​។

 

 

 

 

មន្ត្រី​តុលាការ​ដដែល​បន្ត​ថា​ បច្ចុប្បន្ន​ជនត្រូវចោទ​និង​សំណុំរឿង​ ត្រូវ​បាន​បញ្ជូន​ទៅ​ចៅក្រម​ស៊ើបសួរ​ ចាត់​ការ​បន្ត​តាម​នីតិវិធី​។ នៅ​ដំណាក់កាល​នេះ​ ចៅក្រម​ស៊ើបសួរ​ នឹង​សម្រេច​ឃុំ​ខ្លួន​ឬ​មិន​ឃុំ​ខ្លួន​ជនត្រូវចោទ​ តែ​តាម​បទល្មើស​ទំនង​ជា​ចៅក្រម​ស៊ើបសួរ​នឹង​សម្រេច​ឃុំ​ខ្លួន​ជនត្រូវចោទ​។

គួរ​បញ្ជាក់​ថា​ នៅមុនពេលកើតហេតុ​ គឺ​សមត្ថកិច្ច​ទទួល​ព័ត៌មាន​ថា​ មានករណី​អគ្គិភ័យ​ឆាបឆេះបានកើតឡើង ទើប​សមត្ថកិច្ច​និង​ប្រជាពលរដ្ឋបានជួយពន្លត់ ដោយប្រើរថយន្តពន្លត់​អគ្គិភ័យ​របស់​ទ័ព​ឆត្រយោង​៩១១​ អស់ពីរ​គ្រឿង ប្រើប្រាស់ឡាន​ទឹក អស់៦​គ្រឿង​ ទើប​រលត់​ជា​ស្ថាពរ​។

តាមសាក្សីបំភ្លឺ​ឈ្មោះឃឿន​ ធឿន​ ភេទប្រុស​ អាយុ៣៨ឆ្នាំ​ ជាកម្មករ​ គឺ​​បានឃើញរថយន្តមួយគ្រឿង​មានគ្នា​៤ទៅ៥នាក់ចូលទៅដុតឈើ​ ហើយបានគំរាមមិនឱ្យចូលពន្លត់ភ្លើងកំពុង​ឆេះនោះទេ​ ដោយ​ប្រពន្ធ​ម្ចាស់រោងចក្រ​ ឈ្មោះ​ កែវ​ រតនៈ​ ហៅ​ហ្គិច​ បើកបររថយន្តម៉ាក​ឡិចស៊ីស​៥៧០​ ស៊េរី​ឆ្នាំ​២០​១៧​ ពាក់ផ្លាកលេខ​ ខម​-៦៧៦២ ជាអ្នកដុត​។

 

 

 

 

បន្ទាប់​ពី​បង្ក​ហេតុ​រួច​ នាង​ហ្គិច​ បើក​ឡាន​រត់​គេច​ខ្លួន​ តែ​ត្រូវ​សមត្ថកិច្ច​ចាប់​បាន​មក​វិញ​។

នេះ​ពុំ​មែន​ជា​លើក​ទី​១​ទេ​ ដែល​ស្ត្រី​ឈ្មោះ​ កែវ​ រតន​:​ ហៅ​ ហ្គិ​ច​ បាន​បង្ក​ការ​អុកឡុក​ធ្វើ​ឱ្យ​ភ្ញាក់ផ្អើល​ដល់​សង្គម​នោះ​។​ កាលពី​ដប់​ឆ្នាំ​មុន​ ស្ត្រី​រូប​នេះ​ធ្លាប់​បាន​ដក​កាំភ្លើង​បាញ់​គំរាម​ពលរដ្ឋ​ នៅ​ជិត​វត្ត​សន្សំ​កុសល​ ហើយ​ត្រូវ​បាន​តុលាការ​ផ្តន្ទាទោស​ពី​បទ​ បាញ់បោះ​សេរី​ និង​ប្រើប្រាស់​អាវុធ​ខុសច្បាប់​ ។​ ក្រោយមក​ចុងឆ្នាំ​២០១៦​ កន្លង​ទៅ​ ស្ត្រី​រូប​នេះ​បាន​បើកបរ​ក្រោម​ឥទ្ធិពល​គ្រឿង​ស្រវឹង​ បង្ក​គ្រោះថ្នាក់​ធ្ងន់ធ្ងរ​ដល់​យុវជន​ពីរ​រូប​ ត្រូវ​បាន​តុលាការ​សម្រេច​ឃុំ​ ខ្លួន​ដាក់​ពន្ធនាគារ​ផង​ដែរ​៕

 

 

ប្រភព៖ http://www.freshnewsasia.com/index.php/en/localnews/84410-2018-04-18-03-21-23.html

 

Facebook Comment

Related Articles