ប៉ូលីសនៅក្នុងប្រទេសអូស្រ្តាលីកំពុងតែពិនិត្យឡើងវិញនូវករណីក្មេងប្រុស វ័យ ១២ ឆ្នាំជនជាតិអូស្រ្តាលីម្នាក់បានហោះហើរមកកាន់កោះបាលីប្រទេសឥណ្ឌូនេស៊ីតែម្នាក់ឯងដែលវាបានបង្ករជាការភ្ញាក់ផ្អើល។

តាមរយៈសម្តីរបស់ក្រុមគ្រួសារក្មេងប្រុសបានឲ្យដឹងថា គ្រួសាររបស់គេទាំងអស់គ្នា បានគ្រោងធ្វើដំណើរកំសាន្តនៅក្នុងកោះបាលី ក៏ប៉ុន្តែពួកគេបានលុបវា ចោលទៅវិញ ដោយជ្រើសយកកន្លែងផ្សេងជំនួស។

បន្ទាប់មកក្មេងប្រុសវ័យ ១២ ឆ្នាំ ត្រូវបានក្រុមគ្រួសារប្រកាសពីដំណឹងបាត់ខ្លួន ក្រោយការលុបចោលគ្រោងការណ៍ទៅកាន់កោះបាលីបានចំនួន ៩ ថ្ងៃ និងបាន តាមស្វែងរកគេគ្រប់ទីតាំងដូចជាសាលារៀនជាដើម។ រហូតដល់ថ្ងៃទី ១៧ ខែ មិនាប៉ូលីសឥណ្ឌូនេស៊ីបានរកឃើញក្មេងប្រុសម្នាក់នេះ នៅលើកោះ បាលី បន្ទាប់ពីការសាកសួរគឺក្មេងប្រុសបានប្រាប់ថា គេបាន ប្រើប្រាស់ លិខិតឆ្លងដែន និងកាតសិស្សរបស់ខ្លួនដើម្បីមកកាន់កោះបាលី។

បញ្ជាក់ថាក្រោយការរកឃើញកូនប្រុសវ័យ ១២ ឆ្នាំវិញ ឪពុកម្តាយរបស់គេបាន បង្ហាញអារម្មណ៍ស្រឡាំងកាំង មិនយល់ថាហេតុអ្វីបានជាកូនរបស់ពួកគេអាច ឆ្លងដែនបានយ៉ាងស្រួលៗបែបនេះ៕