(សៀមរាប)​៖ កិច្ចប្រជុំឧត្តមមន្ត្រីសុខាភិបាលអាស៊ាន​បូកបី លើកទី៨ និងកិច្ចប្រជុំប្រជុំឧត្តមមន្ត្រីសុខាភិបាលអាស៊ាន-ចិន ស្ដីអំពីការអភិវឌ្ឍន៍លើវិស័យ សុខាភិបាល បានប្រារព្ធធ្វើឡើង ដោយ​មានចូលរួមពីឧត្តមមន្ត្រី មកពីបណ្ដាប្រទេសជាសមាជិកអាស៊ានទាំង១០ និងប្រទេសបូកបី គឺមាន ចិន ជប៉ុន និងកូរ៉េខាងត្បួង និងអគ្គលេខាធិការអាស៊ាន​ នៅថ្ងៃទី២៦ ខែមេសា ឆ្នាំ២០១៨នេះ នៅសណ្ឋាគារ​សុខា​អង្គរ ក្រុងសៀមរាប​។

កិច្ចប្រជុំ​នេះផងដែរ អគ្គលេខាធិការអាស៊ាន បានប្រកាសប្ដូរវេនប្រធានសម្រាប់អាណត្តិថ្មី ក្នុងរយៈពេលពីរឆ្នាំបន្ត (២០១៨-២០១៩) ដែលកម្ពុជា គឺលោកស្រីវេជ្ជបណ្ឌិត​ ឱ​ វណ្ណឌីន​ អគ្គនាយកបច្ចេកទេសក្រសួងសុខាភិបាល​ ត្រូវធ្វើជាប្រធានបន្ទាប់ពី ប្រ៊ុណេ ដារ៉ូសាឡឹម ហើយសហប្រធាននេះដែរ គឺសាធារណរដ្ឋកូរ៉េ ​បានប្ដូរវេនជូនសាធារណរដ្ឋប្រជាមានិតចិន​ដូចគ្នាផងដែរ។

អគ្គលេខាធិការអាស៊ាន ក៏បានលើកឡើងអំពីចំណុចសំខាន់ៗ ដែលជាលទ្ធផល នៃកិច្ចប្រជុំលើកទី១៣ របស់កិច្ចប្រជុំរដ្ឋមន្ត្រីសុខាភិបាលអាស៊ាន (AHMM) និងលទ្ធផល​នៃកិច្ចប្រជុំឧត្តមមន្ត្រីសុខាភិបាលអាស៊ាន បូកបី លើកទី៧ (APTHMM) ​និងកិច្ចប្រជុំពាក់ព័ន្ធមួយចំនួនទៀត​ ហើយលោកក៏បានរាយការណ៍ អំពីបច្ចុប្បន្នភាព នៃលទ្ធផលនានា និងព្រឹត្តិការណ៍ពាក់ព័ន្ធនានារបស់ខ្លួន ទាំងនៅថ្នាក់តំបន់ និងអន្តរជាតិ​ផងដែរ​។

អគ្គលេខាធិការអាស៊ាន និងសហប្រធាន បានបូកសរុបនូវលទ្ធផល នៃសកម្មភាពកិច្ចប្រជុំ​ដើម្បីកំណត់សម្រេច ផ្ដល់អាទិភាពលើចំណុចសំខាន់ៗនានា សម្រាប់កិច្ចសហប្រតិបត្តិការ ក្នុងឆ្នាំ២០១៧-២០១៨ ក៏ដូចជាការដាក់ស្នើ​សុំសេចក្ដីសម្រេចនូវចំណុច ជាអាទិភាពនានាលើវិស័យសុខាភិបាល សម្រាប់កិច្ចសហប្រតិបត្តិការក្នុងឆ្នាំ២០១៨-២០១៩​។

​នៅរសៀលថ្ងៃដដែលនោះ ក៏មានកិច្ចប្រជុំឧត្តមមន្ត្រីសុខាភិបាលអាស៊ាន-ចិន លើកទី៨ ស្ដីអំពី ការអភិវឌ្ឍន៍លើវិស័យសុខាភិបាល (8th ASEAN-CHINA SOMHD MEETING) ដែលកិច្ចប្រជុំនេះ បានផ្ដោត និងបង្ហាញនូវលទ្ធផល និងយុទ្ធសាស្ត្រនានាសម្រាប់កិច្ចសហប្រតិបត្តិការបន្តក្នុងអាណត្តិបន្ទាប់ទៀត​ផងដែរ​។

សូមបញ្ជាក់ថា កាលពីកិច្ចប្រជុំ SOMHD លើកទី៧ គឺបានធ្វើបច្ចុប្បន្នភាពសម្រាប់ការអនុវត្តសកម្មភាព ដែលបានឯកភាព​សម្រាប់កិច្ចសហប្រតិបត្តិការ ដោយផ្ដោតលើ ការធានារ៉ាប់រ៉ងនូវសុខភាពទូទៅ, គ្មានជំងឺ រោគឆ្លងគ្រប់ប្រភេទ, ឱសថបុរាណ, សុខភាពមនុស្សចាស់, ធនធានមនុស្សក្នុងវិស័យសុខាភិបាល, ការឆ្លើយតប និងសង្គ្រោះជំងឺ រោគឆ្លង និងរាល់ការគំរាមកំហែងនានា ចំពោះ​សុខភាព​។

សម្រាប់ឆ្នាំ២០១៨-២០១៩ បានឯកភាពគ្នា ក្នុងការបន្តសហការនូវរាល់ចំណុច ដែលបានឯកភាព​នាកិច្ចប្រជុំលើកទី៧ខាងលើនេះ បូកបន្ថែម​បច្ចេកវិទ្យាព័ត៌មាន សម្រាប់ការថែទាំសុខភាព, ប្រឆាំងនឹងភាពស៊ាំនៃអង់ទីស្កុប, បញ្ចប់នូវរាល់ទម្រង់នៃការខ្វះអាហាររូបត្ថម្ភ, សុវត្ថភាពចំណីអាហារ និងការគ្រប់គ្រងសុខភាព​ពេលមានគ្រោះមហន្តរាយ​៕

ប្រភព៖ http://www.freshnewsasia.com/index.php/en/localnews/85282-2018-04-26-15-32-16.html