រាជធានីភ្នំពេញ ៖ នៅវេលាម៉ោង០១ និង២០នាទីរំលងអាធ្រាត ថ្ងៃពុធ ៨កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែមិថុនា ឆ្នាំ២០១៨ មាន​អគ្គីភ័យ​មួយ​កន្លែង​កើតឡើងនៅវត្ថលង្កា ស្ថិតតាមបណ្តោយផ្លូវលេខព្រះស៊ីហនុ ភូមិទី៥ សង្កាត់បឹងកេងកងទី១ ខណ្ឌចំការមន រាជធានីភ្នំពេញ។ អគ្គីភ័យនេះបានឆេះកុដិទំហំ៧ម៉ែត្រ X ១២ម៉ែត្រ ប្រភេទ​សំណង់​ថ្មប្រក់ស័ង្កសី អស់ទាំងស្រុង ម៉ូតូចំនួន០៣គ្រឿង និង​សំភារះ​មួយ​ចំនួន​ មូលហេតុបណ្តាលមកពីឆ្លងចរន្តអគ្គិសនី ដែល​មាន​ម្ចាស់​កុដិ​ទទួលខុសត្រូវ ឈ្មោះ ឈុំ ណារិទ្ធិ ភេទប្រុស អាយុ៣៤ឆ្នាំ។

បន្ទាប់ពីក្រោយទទួលបានព័ត៌មានទាន់ហេតុការណ៍ភ្លាម រថយន្តពន្លត់អគ្គីភ័យរបស់ស្នងការដ្ឋាននគរបាលរាជធានីភ្នំពេញ បានចេញទៅពន្លត់ចំនួន១៧គ្រឿង ប្រើប្រាស់ទឹកអស់១៧រថយន្ត ស្មើនឹង៦៨ម៉ែត្រគូប និង​មាន​រថយន្ត​ពន្លត់​អគ្គីភ័យ​ជំនួយ​របស់​ក្រុមហ៊ុន​ស្រាបៀរកម្ពុជាចំនួន០១គ្រឿង ប្រើប្រាស់​ទឹក​អស់​០១​រថយន្ត ស្មើនឹង០៤ម៉ែត្រគូប រថយន្តកPMចំនួន០២គ្រឿង ប្រើប្រាស់ទឹកអស់០២រថយន្ត ស្មើនឹង០៦ម៉ែត្រគូប រថយន្ត​ជ្រោយចង្វារ​ចំនួន០៣គ្រឿង ពុំបានប្រើប្រាសទឹក និង​រថយន្ត​កោះពេជ្រចំនួន០១គ្រឿងពុំបានប្រើប្រាសទឹក។ អគ្គីភ័យបានរលត់ទាំងស្រុងនៅវេលាម៉ោង០២និង០០នាទី នាយប់ថ្ងៃខែឆ្នាំដដែលពុំបណ្តាលឲ្យឆេះរាលដាលដល់កុដិ ផ្ទះអ្នកជិតខាង និង​ពុំ​បណ្តាល​ឲ្យ​មាន​មនុស្ស​រង​របួស​ឬ​ស្លាប់​ឡើយ​ ៕

ប្រភព៖ស្នងការដ្ឋាននគរបាលរាជធានីភ្នំពេញ