អតីតប្រធានាធិបតីអាមេរិក លោក Barack Obama និង ភរិយា លោកស្រី Michelle Obama ហាក់ដូចជាកាន់តែឃ្លាតឆ្ងាយពីឆាកនយោបាយហើយ បន្ទាប់ពីអ្នកទាំងពីរបានប្រកាសអំពីគម្រោងនិងការងារថ្មីដែលនឹងចាប់ផ្ដើមនៅពេលឆាប់ៗនេះ។

ការងារថ្មីរបស់គូស្វាមីភរិយាទាំងពីរ ដូចជាចម្លែកអារម្មណ៍ និង បង្កការភ្ញាក់ផ្អើលសម្រាប់មហាជនដែលនៅតែគាំទ្រអ្នកទាំងពីរ។ ការងារនោះគឺ អ្នកទាំងពីរនឹងធ្វើការរួមគ្នាជាមួយក្រុមហ៊ុន Netflix ក្នុងការបង្កើតខ្សែភាពយន្ដ រឿងភាគ កម្រងឯកសារ ជាដើម។ ក្នុងនោះ អ្នកទាំងពីរនឹងធ្វើការពាក់ព័ន្ធនឹងការបង្កើតមាតិកា (content) អត្ថបទ របស់ភាពយន្ដ និង ឯកសារ។ យ៉ាងណាមិញ គេមិនបានបង្ហើបពីប្រាក់ចំណូលដែលទទួលបានពីក្រុមហ៊ុន Netflix របស់អ្នកទាំងពីរ។

ចំណែកឯពេលវេលានៃការចាក់បញ្ចាំង អាចចាប់ផ្ដើមពីថ្ងៃ១៩ ខែឧសភា ឆ្នាំ២០១៩។ ប្ដីប្រពន្ធ Obama មិនទាន់បង្ហើបថា​ នឹងបង្កើតមាតិកាប្រភេទណានោះទេ ប៉ុន្ដែ មាតិកានោះនឹងមិននិយាយពីនយោបាយចំៗឡើយ។ គួរបញ្ជាក់ថា ក្រុមហ៊ុន Netflix ជាក្រុមហ៊ុនយក្សរបស់អាមេរិកដែលផលិតការកម្សាន្ដ រួមមាន វីឌីអូ ខ្សែភាពយន្ដ ដែលដាក់ឲ្យមើលតាមអ៊ីនធើណែត តែតម្រូវឲ្យអថិតិជនចុះឈ្មោះនិងបង់ប្រាក់ដើម្បីមើលបាន៕

ប្រភព៖ https://metro.co.uk/2018/05/22/barack-obama-michelle-start-producing-netflix-films-documentary-7566484/