«ខ្ញុំស្អប់ទូរស័ព្ទរបស់ម៉ាក់ខ្ញុំ!» តែងសេចក្ដីរបស់សិស្សថ្នាក់ទី២ ពិតជាចាក់ដោត ឪពុកម្ដាយត្រូវតែភ្ញាក់ខ្លួន… |

1199 Views

May 24, 2018

យើងដឹងហើយថា ទូរស័ព្ទមានប្រយោជន៍សម្រាប់យើងនៅក្នុងជីវិតប្រចាំថ្ងៃ ដោយខ្វះមិនបាន ប៉ុន្តែទូរស័ព្ទក៏ជះឥទ្ធិពលអាក្រក់ដល់ទម្លាប់ និង ជីវភាពរស់នៅដែរ ប្រសិនបើយើងបណ្ដែតបណ្ដោយឲ្យវាមកគ្រប់គ្រងយើង។

យ៉ាងណាក៏ដោយ ក៏យើងមិនខ្ចីទុកទូរស័ព្ទមួយឡែកសិនដែរ ដោយរវល់តែឈ្ងោកអោនមុខ ចុចហ្វេសប៊ុក ឬ បណ្ដាញសង្គមផ្សេងៗ។ ចុះបើពេលណាមួយ ក្មេងៗ កូនៗរបស់អស់លោកអ្នក ប្រាប់ពីអារម្មណ៍របស់ពួកគេ នៅពេលដែលលោកអ្នករវល់តែចុចទូរស័ព្ទ ហើយមិនសូវយកចិត្តទុកដាក់ចំពោះគេ?

ជាក់ស្ដែង កាលពីពេលថ្មីៗនេះ មានអ្នកគ្រូបឋមសិក្សាម្នាក់នៅសហរដ្ឋអាមេរិក បានដាក់តែងសេចក្ដីឲ្យកូនសិស្សថ្នាក់ទី២ (អាយុ៧-៨ឆ្នាំ) និយាយពី របស់អ្វីដែលគេប្រាថ្នា មិនចង់ឲ្យមានការបង្កើតឡើង។ ក្នុងនោះ សិស្ស៤នាក់ក្នុងចំណោម២១នាក់ មានចម្លើយដូចគ្នា នោះគឺ ទូរស័ព្ទដៃ។ គេមិនចង់ឲ្យទូរស័ព្ទដៃបង្កើតឡើងឡើយ។

កូនសិស្សម្នាក់បានសរសេរថា៖ «របស់បង្កើតថ្មីដែលខ្ញុំមិនចូលចិត្តនោះគឺទូរស័ព្ទដៃ។ ខ្ញុំមិនចូលចិត្តទូរស័ព្ទ ព្រោះប៉ាម៉ាក់របស់ខ្ញុំចុចទូរស័ព្ទជារៀងរាល់ថ្ងៃ។ ទូរស័ព្ទជួនកាលបង្កទម្លាប់អាក្រក់។ ខ្ញុំស្អប់ទូរស័ព្ទម៉ាក់ខ្ញុំ ខ្ញុំបន់ឲ្យគាត់គ្មានវាល្អជាជាង។ នេះជារបស់បង្កើតថ្មីដែលខ្ញុំមិនចូលចិត្ត»។

អ្នកគ្រូក៏បានថតសំណេរនេះ និង បង្ហោះលើហ្វេសប៊ុក ធ្វើឲ្យមានការស៊ែរជាង ២៤ម៉ឹនដង និង ខមិនជាច្រើន។ ដូច្នេះ ឪពុកម្ដាយដែលចំណាយពេលជាមួយទូរស័ព្ទ ច្រើនជាងនិយាយជាមួយកូនៗ សូមភ្ញាក់ខ្លួនឡើង ហើយកាត់បន្ថយការប្រើទូរស័ព្ទ ដើម្បីក្ដីស្រឡាញ់ ភាពកក់ក្ដៅនៅក្នុងគ្រួសារជាមួយកូនៗ៕