តុក្កតា​តំណាង World Cup ២០១៨ នៅ​ប្រទេស​រុស្ស៊ី​មាន​ឈ្មោះ​ថា ហ្សាប៊ីវ៉ាកា “Zabivaka” ជា​ភាសា​រុស្ស៊ី ដែល​មាន​ន័យ​ថា “អ្នក​ទាត់​បញ្ចូល​ទី (The One Who Scores)” លើក​លែង​តែ​អតីត​ជម្រើស​ជាតិ​រុស្ស៊ី Andrey Arshavin ដែល​បាន​បក​ប្រែ​ក្នុង​ន័យ​កំប្លែង​ថា “អ្នក​ទាត់​មិន​ចូល​ទី”។

Zabivaka គឺ​ជា​សត្វ​ចចក។ វា​ពាក់​វ៉ែនតា​ពណ៌​ទឹកក្រូច។ បើ​តាម​គេហទំព័រ​ផ្លូវការ​របស់ FIFA បាន​ឲ្យ​ដឹង​ថា ចចក​នេះ​​ពេញ​ដោយ​ស្នាម​ញញឹម គួរ​ឲ្យ​ស្រលាញ់ និង ទំនុក​ចិត្ត ហើយ​វា​​ជា​អ្នក​តំណាង​និម្មិត​ ដែល​នឹង​ញ៉ាំង​ឲ្យ​បរិយាកាស​ជុំវិញ​ទីលាន​កាន់​តែ​មាន​​ភាព​សប្បាយ​រីករាយ។​Zabivaka ត្រូវ​បាន​ជ្រើសរើស​ឲ្យ​ក្លាយ​ជា​តុក្កតា​តំណាង World Cup ២០១៨ ដោយ​ ប្រជាជន​រុស្ស៊ី​ជាង​១​លាន​នាក់​បាន​បោះ​ឆ្នោត​នៅ​លើ FIFA.com ក្នុង​អំឡុង​ពេល​បោះឆ្នោត​រយៈ​ពេល​មួយខែ​​កាល​ពី​ឆ្នាំ ២០១៦។

ដោយឡែក តុក្កតា​តំណាង World Cup ២០១៤ នៅ​ប្រទេស​ប្រេស៊ីល គឺ​ជា​រូប​សត្វ​ពង្រូល ឆ្នាំ​២០១០ នៅ​អាហ្វ្រិក​ខាងត្បូង តំណាង​ដោយ​សត្វ​ខ្លារខិន រីឯ ២០០៦ នៅ​អាឡឺម៉ង់​​គឺ​ជា​សត្វ​តោ ដែល​អាឡឺម៉ង់​​យក​គំរូ​​សត្វ​តំណាង​នេះ​ដូច​អង់គ្លេស​កាល​ធ្វើ​ជា​ម្ចាស់​ផ្ទះ​ World Cup ឆ្នាំ ១៩៦៦ ខណៈ​ដែល​សត្វ​តំណាង​ World Cup ២០០២ នៅ​​កូរ៉េ និង ជប៉ុន គឺ​ជា​តុក្កតា​បង្កើត​ឡើង​​ដោយ​ការ​ស្រមើស្រមៃ​ពី​កុំព្យូទ័រ នាំ​​ឲ្យ​មាន​ការ​រិះ​គន់​ពី​មជ្ឈដ្ឋាន​ទូទៅ​។

តុក្តតា​តំណង​និម្មិត​នៅ​កូរ៉េ និង ជប៉ុន មាន​ឈ្មោះ​ថា Ato, Kaz និង Nik (គឺ​ជា​​តុក្តតា​ពណ៌​ទឹក​ក្រូច ពណ៌​ស្វាយ និង ពណ៌​ខៀវ)។ Ato គឺ​ជា​គ្រូ​បង្វឹក ហើយ Kaz និង Nik គឺ​ជា​កីឡាករ។ មូលហេតុ​នេះ​ហើយ​ទើប​ធ្វើ​ឲ្យ​មនុស្ស​ជុំវិញ​ពិភពលោក​ភ្ញាក់ផ្អើល និង សឹង​មិន​ជឿ​ថា​​​តុក្តតា​បែប​នេះ​ត្រូវ​បាន​គេ​​​ច្នៃ​បង្កើត​ឡើង​សម្រាប់​ព្រឹត្តិការណ៍​ពិភពលោក​បែប​នេះ។ ប៉ុន្តែ​​គ្មាន​អ្វី​ត្រូវ​ភ្ញាក់ផ្អើល​នោះ​ទេ ព្រោះ Ato, Kaz និង Nik ​ត្រូវ​បាន​បោះឆ្នោត​ដោយ​អ្នក​ប្រើប្រាស់​អ៊ីនធឺណិត និង ភ្ញៀវ​នៅ​ហាង​ប៊ឺគ័រ McDonald នៃ​ប្រទេស​ម្ចាស់ផ្ទះ​ទាំង២។ នេះ​បើ​តាម The Sun៕